நீங்கள் தேடியது "என்ஜினீயரிங் படிப்பு"

சென்னை:

பா.ம.க. நிறுவனர் டாக்டர் ராமதாஸ் வெளியிட்டுள்ள அறிக்கையில் கூறி இருப்பதாவது:-

நாடு தழுவிய அளவில் பொறியியல் படிப்புக்கும் நீட் தேர்வு நடத்தும் திட்டம் கைவிடப்படவில்லை என்றும், இதுதொடர்பாக மாநில அரசுகளை வலியுறுத்தப் போவதாகவும் அனைத்திந்திய தொழில் நுட்பக் கல்விக்குழுவின் தலைவர் அனில் சகஸ்ர புத்தே கூறியிருக்கிறார். பொறியியல் படிப்புக்கான நீட் தேர்வு குறித்து மாநில அரசுகளை கட்டாயப்படுத்தப் போவதில்லை என தொழில் நுட்பக் கல்விக்குழு ஏற்கனவே அறிவித்திருந்த நிலையில், இப்போது நீட் தேர்வை மீண்டும் வலியுறுத்துவது கண்டிக்கத்தக்கதாகும்.

பொறியியல் படிப்புகளுக்கு தேசிய அளவில் பொது நுழைவுத் தேர்வு நடத்தப்படுவதன் மூலம் மாணவர்கள் ஒன்றுக்கும் மேற்பட்ட நுழைவுத் தேர்வுகளை எழுதுவது தவிர்க்கப்படும் என்றும் கூறியுள்ளார். இதை ஏற்க முடியாது.

பொறியியல் படிப்புக்கான பொது நுழைவுத்தேர்வு அறிமுகம் செய்யப்பட்டால், அது மத்திய இடைநிலைக் கல்வி வாரிய (சி.பி.எஸ்.இ) பாடத்திட்டத்தின்படிதான் நடத்தப்படும். இது மாநிலப் பாடத்திட்டத்தில் பயிலும் மாணவ, மாணவிகளின் பொறியியல் கல்வி வாய்ப்புகளை கடுமையாக பாதிக்கும். மருத்துவப் படிப்புக்கான நீட் தேர்வு அறிமுகம் செய்யப்பட்ட பின்னர், தமிழகத்திலுள்ள மருத்துவக் கல்லூரிகளில் சேரும் மாநிலப் பாடத்திட்ட மாணவர்களின் எண்ணிக்கை பாதியாக குறைந்து விட்டது. ஊரக, ஏழை மாணவர்களுக்கு மருத்துவக் கல்வி என்பது கனவில் கூட நினைத்துப் பார்க்க முடியாத ஒன்றாகிவிட்டது.

பொறியியல் படிப்புக்கும் நீட் தேர்வு அறிமுகம் செய்யப்பட்டால் அது சமூக நீதிக்கு சாவுமணி அடிக்கும் செயலாக அமையும். இதைக் கருத்தில் கொண்டு பொறியியல் நீட் தேர்வை திணிக்கக் கூடாது என்று மத்திய அரசை தமிழக அரசு வலியுறுத்த வேண்டும். மாநில உரிமைகளைப் பறிக்கும் பொறியியல் நீட் தேர்வுக்கு எதிராக தமிழகத்திலுள்ள அனைத்து கட்சிகளும், அமைப்புகளும் குரல் கொடுக்க வேண்டும்.

இவ்வாறு டாக்டர் ராமதாஸ் கூறியுள்ளார்.

சென்னை:

என்ஜினீயரிங் படிப்புகளுக்கான கலந்தாய்வு இந்த ஆண்டு ஆன்-லைன் மூலம் நடைபெறுகிறது.

பொதுப் பிரிவு மாணவர்களுக்கு ஆன்லைன் வழியாகவும் சிறப்பு பிரிவு மாணவர்களுக்கு சென்னை அண்ணா பல்கலை கழகத்தில் நேரடை கலந்தாய்வும் நடைப் பெறுகிறது. சிறப்பு பிரிவு கலந்தாய்வு இன்று தொடங்கியது. முதலில் கண்பார்வை குறைந்த மாணவர்களுக்கான கலந்தாய்வு நடந்தது.

இதையடுத்து காது கேளாதோர், ஆட்டிசம் மற்றும் மாற்றுத் திறனாளிகளுக்கு கலந்தாய்வு நடைபெற்றது. இன்று நடந்த கலந்தாய்விற்கு 320 பேர் விண்ணப்பித்து இருந்தனர். இதில் 167 பேர் விண்ணப்பங்கள் தகுதியானதாக தேர்வு செய்யப்பட்டு அவர்களுக்கு தகவல் கொடுக்கப்பட்டு இருந்தது.

சிறப்பு பிரிவு கலந்தாய்வில் குறைந்த அளவில்தான் மாணவ-மாணவிகள் பங்கேற்றனர். சிறப்பு பிரிவினருக்கான மொத்த இடங்கள் 7175 ஆகும்.

நாளை (சனிக்கிழமை) முன்னாள் ராணுவத்தினரின் பிள்ளைகளுக்கு கவுன்சிலிங் நடக்கிறது. 8-ந்தேதி (ஞாயிற்றுக்கிழமை) விளையாட்டு பிரிவு மாணவர்களுக்கு கலந்தாய்வு நடக்கிறது.

பொதுப்பிரிவு கலந்தாய்வு 10-ந்தேதிக்கு பின்னர் தொடங்குவதற்கு வாய்ப்பு உள்ளது. முதல் கட்ட மருத்துவ கவுன்சிலிங் நாளையுடன் நிறைவடைவதால் அதனைத் தொடர்ந்து பொதுப் பிரிவு கலந்தாய்வை நடத்த திட்ட மிட்டுள்ளனர்.